Mu rwibutso rwa Jenoside yakorewe Abatutsi rwa Gatwaro mu Murenge wa Gishyita mu Karere ka Karongi hashyinguwe imibiri y’abatutsi bishwe muri Jenoside 143.

Ni igikorwa cyabanjirijwe no kunamira imibiri ishyinguye mu nzibutso za Paruwasi St Pierre, Home St Jean ndetse n'i Nyamishaba. Hari abashyitsi barangajwe imbere na Guverineri w’Intara y’Iburengerazuba, Bwana Ntibitura Jean Bosco wasabye abazi ahari indi mibiri kuherekana igashyingurwa mu cyubahiro, kwerekana ahari abakoze jenoside bagahanwa no kwirinda ingengabitekerezo ya jenoside, nk’intambwe yo kwimakaza ubumwe n’ubudaheranwa.

Mu ijambo ry’ikaze, Umuyobozi w'Akarere ka Karongi, Bwana Muzungu Gerald yashimiye abitabiriye igikorwa cyo kwibuka Jenoside yakorewe Abatutsi, ashimira ingabo zahoze ari iza FPR Inkotanyi zahagaritse Jenoside yakorerwaga Abatutsi, zikimakaza ubumwe n'ubudaheranwa mu Banyarwanda.
 

Meya Muzungu Gerald yavuze ko bitewe n'ubukana bwa Jenoside yakorewe mu yahoze ari Perefegitura Kibuye ku buryo n'ubu imibiri y'abishwe ikiboneka ndetse hari n'iyabonetse ejo hashize, ibikomere bikiri bishya ku banya-Karongi n'abayirokotse muri rusange. 

Akomeza avuga ko kwibuka Jenoside yakorewe Abatutsi, ari ugusubiza agaciro ubumuntu bwatakaye no kongera kubaka u Rwanda ruzira amacakubiri, rwiyubatse ku ndagagaciro z’ubumwe, rurangajwe imbere na Perezida wa Repubulika Paul Kagame.

Meya Muzungu Gerald asaba buri wese kurangwa n’indangagaciro zo kurwanya ingengabitekerezo n’ihakana rya Jenoside iryo ari ryo ryose. Yungamo ko ari igihe cyo gufasha abarokotse Jenoside, cyane ahereye ku mwihariko wa Jenoside yakozwe mu yahoze ari Perefegitura Kibuye.

Ndagijimana Kalisa Flavien watanze ikiganiro, yagaragaje uruhare rw’abakoloni mu gusenya ubumwe bw’Abanyarwanda, urw’ubutegetsi bwariho mu gucura ingengabiterekezo ya Jenoside no kuyikora n'uburyo amahanga muri iki gihe agihembera iyo ngengabitekerezo afatanyije n’abanga igihugu.
 

Mukantabana Anne Marie watanze ubuhamya bw’uburyo batojejwe mu mashuri bazira ko ari Abatutsi, muri Jenoside ahungira mu kiliziya ya Paruwasi st Pierre, aho interahamwe zishemo benshi. 

Yahungiye aharimo mu bitaro bya Kibuye n'ahandi kugeza arokowe n’inkotanyi zamuhaye ubuzima.
Bwana Kabera Cyprien, mu ijambo ry'abafite ababo bashyingurwa mu cyubahiro, yavuze ko Imana yakoresheje abamalayika bitwa Inkotanyi mu kurokora abatutsi bari benshi muri aka gace. Asaba kuzamushimirira Perezida wa Repubulika n’ingabo z’inkotanyi yari ayoboye kuko zabarokoye.

Perezida wa Ibuka, Ngarambe Vedaste yagaragaje uburyo mu yahoze ari Perefegitura ya Kibuye abatutsi basaga ibihumbi 200 bishwe mu gihe cy'iminsi 7 ku itegeko rya Perefe Kayishema Clement. Yasabye gukomeza gushaka abakoze Jenoside bagahanwa no gukurikirana abadatanga amakuru.
Igikorwa cyasojwe no gushyingura mu cyubahiro imibiri 143 yabonetse mu mirenge itandukanye y’aka Karere, harimo isaga 80 iyabonetse ahari bariyeri hafi y’ishuri ryari ETO Kibuye( RP, College Karongi).